Tuesday, October 14, 2003

gham

samandar ki ek lehar,
jo thamti na thi,
shaam ki wo ghadi,
jo badhti na thi,
Par badh rahi thi,
umr uski,
haan wo raat,
sau baras lambi thi,
sheeshe ke kuchh tukre,
zameen par the bikhre,
khud se ye puchhte,
ki wo kisse hain bichhre,
chirag jaisa,
kuchh jal raha tha,
zindagi ki tarah,
mom pighal raha tha,
andhere men khada,
wo ro raha tha,
ro raha tha.............



nahin

Logon ne jo samjha,
wo maine socha bhi nahin,
unhe khayal hai us khayal ka,
jo kabhi aaya hi nahin,
chahte hain sab janen,
dil ki baaten,
par isne kuchh kaha hi nahin,
agar daba tha kahin,
koi ehsaas to,
ab to kuchh raha hi nahin,
samjhte der lage shayad,
par samajh jayenge wo bhi,
ki nahin hai,
kuchh bhi nahin.

Monday, October 13, 2003

Khabon ka milan

Tere khabon men,
tere khayalon men,
baaton men, saanson me,
aur un ehsaason men,
jinme sirf main thi,
meri yaaden, chaahat,
aur aarzoo thi,
kaisi thi yaaden wo,
karti thi bechain jo,
aakar tadpaati thi,
aur kabhi naa jaati thi,
jinke dum se aas-pas,
mere hone ka ehsaas,
har pal milne ki aas thi,
wo pal, jo mere,
sapne laya tha,
wo sapne, jismen tune,
mujhe paya tha,
kaisa tha wo,
khawon ka milan,
kya waisa, jaisa
maine mehsoos kiya tha???


kyon hai??

Daurti bhagti, kabhi na rukti,
har rahi ke man ko janti,
un anant anginat sadkon men,
woh sadak jo is gali tak aati,
itni anjaan kyon hai?

Gali se mudkar,kuchh dur chalkar,
kisi purane kile sa dikhta,
woh makaan,
itna khaali khaali,
aur wiran kyon hai?

Makaan ke us munder par,
jaise khamoshi ki ho saagar,
aur uske kinaare baithi woh,
itni pareshaan kyon hai?

Dard jo andar hai,
baahar to nahin aata nazar,
phir yeh panchhi, ye mausam,
aur ye shaam ka suraj,
itne hairaan kyon hain?

Aakash hai sunaa, hawa hai chup,
din men bhi to nikla tha dhoop,
sangeet nahin koi shor nahin,
baahar to koi hod nahin,
phir mann men,
ye toofaan kyon hai???