Tuesday, January 31, 2006

Yaad

shaam ki tanhaiyon mein,
jaane kyon, mann fir aaj udaas hai,
main hoon, main hi hoon, aur..
kuchhek saaman mere paas hai,

band darwazon ke dariche se,
jhaank kar laut gayi hawa,
ya parde se takrai aur..
khaamoshiyon mein kho gayi hawa,

yaadon ki potli jo kholi,
toh nikla kuchh kahani jaisa,
gard mein dooba, aadha bhula hua,
rangheen, kuchh paani jaisa.



Monday, January 30, 2006

nayan

do uthte nayan, do jhukte nayan,
sine ke andar, wo chubhte nayan,

gham ki ghatayen, mayusi ke pawan,
aur ashkon se bojhal, baraste nayan,

madira ki lahron mein doob jane ko,
nashe mein machalte, bahakte nayan,

viraane se khali, ujde se chaman,
sune murjhaye, gumsum se nayan.



Monday, January 23, 2006

Khichdi

Ek wo hain premi jo tajmahal banaate hain,
humne kaha, suniye ji!
tajmahal nahin naa sahi,
chaliye taj mein khaate hain,

mere kadke pati ne ghabra kar kaha,
jaaneman taj nahin,bas ab aur aaj nahin,
chalo khichdi ghar mein banate hain,
bacchon ke saath picnic manaate hain,

athak parishram aur anginat bahane,
rang laaye ki bacche maane,

hawala diya tradition mein modernity ka,
kaha,five star mein kahan wo baat hai,
fikr na kar tere papa tere saath hain,
picnic mein chaar chaand lagayenge,
khichdi mummy nahin, papa banayenge,

masoomon ki udasi ab toh dekhi nahin jati,
ghadi mein do aur chehre par baje barah,

kisi tarah aakhirkar huyi khichdi taiyar,
pura hua tab chaar ghante ka intezaar,
padosiyon ko bhi tha magar khichdi se hi pyar,

ain waqt aa dhamke,
swagat kiya khichdi ke dam se,
haan ji, hum bhookhe rah gaye,
dil ke armaan aansuon mein bah gaye.



Thursday, January 19, 2006

Sapna

Main soyi thi,
sapnon mein khoyi thi,
kisne jagaaya,
samajh mein na aaya,
ab tha saath mere,
ek ajanabi ka saya,
sapnon ke tajmahal mein,
aarzoo ki kaya,
dhire se ek baar,
wo muskaraya,
mera dil toh fir,
sambhal na paya,
kya kahoon kaise kahoon,
ab usko paraya,
apna nahin par apne jaisa hai wo,
sapna nahin par sapne jaisa hai wo.